Shavkat Rahmon she’riyatida ko`p ma’noli so`zlar o`ziga xos o`ringa ega. Shoir o`z misralarida so`zning turli ma’no qirrasi, so`z ma’nosining ko`lamini va qurshovini alohida noziklik bilan qo`llaydi. Ayniqsa, shoir qo`llagan metaforalar diqqatga sazovor. Metafora poeziyada, albatta, yangilik emas. Lekin u har bir iste’dodli shoirda o`ziga xos jilvalarda namoyon bo`ladi. Shavkat Rahmon metoforalarining o`ziga xosligi ularning qamrovida va mavzuga mayin, tabiiy romantik ohangdoshligida. Unda ayrim obrazlargina emas, balki butun she’r metofora harakatiga quriladi, metafora poetik tilga, obraz mantig`iga, she’riy tafakkur boyligiga aylanadi.