Нутқ товушлари, уларнинг ҳосил бўлиш типлари, ўзгариши, бўғин, интонация, пауза, урғу каби фонетик ҳодисалар ва уларга хос хусусиятлар ҳақида тавсифий фонетикада фикр юритилади. Кайд қилинган ҳодисалар нутқий алоқа жараёнида яхлит бир системага бирлашиб, ягона нутқий актни юзага келтиради. Шундай нутқ занжирини ҳосил қилувчи сегмент ва суперсегмент элементлар нутқда деярли бир хил иштирок этади. Аммо эмоционал-экспрессивликни ифодалашда суперсегмент элементларнинг роли каттадир. Биз ушбу мақоламизда суперсегмент фонетик воситаларда ифодаланган эмоционал-экспрессивлик ҳақида фикр юритамиз.