Юртимиз мустақиллиги аждодларимиздан қолган маънавий меросларни, тарихий ёдгорликларни қайта тиклаш ва таъмирлаш, муқаддас обидаларни файзли масканларга айлантириш учун шароит яратди. Тарихий, маданий ва маънавий меросимизни ўрганиш, авайлаб-асраш келгуси авлодларга етказишнинг ҳуқуқий асослари яратилди. Мамлакатимиз ҳудудидаги дунё цивилизациясида катта ўрин тутган, асрлар давомида таркиб топган тарихий шаҳарларни, минглаб меъморий ва тарихий ёдгорликларни, жумладан икки мингдан ортиқ меъморчилик обидаларини, уч мингдан ортиқ археологик обидаларни, мингга яқин монументал санъат ёдгорликларини ўрганиш, ҳисобга олиш, авайлаб асраш, уларга нисбатан эҳтиёткорона муносабатда бўлиш, келажак авлодларга етказишга йўналтирилган чора-тадбирлар белгиланди ва бу соҳада анчайин самарали ишлар олиб борилди.