Мавзунинг долзарблиги. Иқтисодий интеграция турли корхона ва тармоқларнинг, шунингдек мамлакатларнинг ишлаб
чиқариш соҳасида бир-бирига яқинлашуви, улар ўртасида узвий иқтисодий алоқалар ўрнатилиши, мамлакатлараро ягона
умумий хўжаликнинг шаклланиш жараёни ҳисобланади.
Кооперация ўзаро боғланган ишлаб чиқариш жараёнида ёки саноат тармоқларида кишиларнинг ёки ташкилотларнинг
ҳамкорлик асосида ишлашини ташкил этиш шаклидир.
Бугунги кунда фермер хўжаликлари ҳақли равишда қишлоқ хўжалиги ишлаб чиқаришининг муҳим бўғинига, уни ташкил
этишнинг асосий шаклига айланди. Навбатдаги вазифа эса фермер хўжаликларининг турли шаклдаги кооперацияларини
тузиш, фермер хўжаликлари билан турли корхона ва тармоқларнинг ишлаб чиқариш соҳасида бир-бирига яқинлашуви, улар
ўртасида узвий иқтисодий алоқалар ўрнатилиши, биргаликда ишни ташкил этиш ва ҳамкорликда муаммоларини ҳал этиш
ҳисобланади.
Дарҳақиқат, Ўзбекистон Республикаси Президентининг“Ўзбекистонда фермерлик фаолиятини ташкил қилишни янада
такомиллаштириш ва уни ривожлантириш чора-тадбирлари тўғрисида” Фармонида“...маҳсулот ишлаб чиқариш, харид
қилиш, қайта ишлаш ва сотиш бўйича фермер хўжаликлари кооперациясининг турли шаклларини ташкил этиш ва
кенгайтиришга кўмаклашиш”1 муҳим вазифалардан бири этиб белгиланди.
Фермер хўжаликлари кооперациясини турли шаклларини ташкил қилиш, кооперация тизими иштирокчилари фаолияти
молиявий натижаларини шакллантиришнинг ташкилий-услубий ва ахборот-таҳлил таъминотини ривожлантириш бугунги
кундаги муҳим вазифалардан саналади ҳамда юқорида баён қилинган масалалар бўйича илмий-тадқиқот олиб бориш жуда
муҳимдир.
Бозор шароитида сут ишлаб чиқариш, қайта ишлаш ва сотиш бўйича кооперация тизими иштирокчилари ўртасидаги
иқтисодий муносабатларни ривожлантириш, трансферт баҳоларни ва молиявий натижаларни шакллантириш, фойдани
тақсимлаш ҳисоби ҳамда назоратини такомиллаштириш бўйича илмий асосланган таклиф ва амалий тавсиялар ишлаб
чиқиш долзарб масала ҳисобланади.
Шундай қилиб, аграр соҳада интеграциялашув ва кооперациялашув жараёнлари мамлакатимизда қарор топган бозор
макони, меъёрий-ҳуқуқий база, фундаментал назария, унинг илғор услублари ва халқаро тажрибадан фойдаланган ҳолда
трансферт баҳоларни ва молиявий натижаларни шакллантириш ҳамда фойдани тақсимлаш ҳисоби ва назоратини
такомиллаштиришни тақозо этмоқда.
Ушбу масалалар илмий нуқтаи назардан ҳамда амалий жиҳатдан етарлича тадқиқ қилинмаганлиги эса илмий ишнинг
йўналишини белгилади.
Ушбу масалалар илмий ва амалий жиҳатдан етарлича тадқиқ қилинмаган, бу эса магистрлик диссертациясининг мавзуси
долзарблигини белгилайди.