Инсон истеъмол қиладиган озиқовқат маҳсулотларида оқсилнинг етарли бўлиши муҳим роль ўйнайди. Олимларнинг маълумотларига кўра, инсон бир суткада истеъмол қиладиган овқат маҳсулотлари калориясининг 12 процентини ёки 90-100 граммини оқсил ташкил этиши керак. Ривожланган мамлакатларда бу кўрсаткич 90-95 граммга, эндигина тараққий этиб келаётган мамлакатларда эса 20-25 граммга тўғри келади. Айниқса, ҳайвон оқсилига бўлган талаб жуда катта, Ер юзи бўйича ҳайвон оқсили ишлаб чиқариш талабга нисбатан 4 марта камдир.
Ҳозирги кунда Ер шари аҳолиси 7 миллиарддан ошди. Шунча миқдордаги кишини ўсимлик оқсили билан таъминлаш учун ҳозирги пайтда ишлаб чиқилаётган оқсилга қараганда 20 марта кўп оқсил тайёрлаш керак. Шуни айтиш керакки, биз ҳозирги пайтда ҳам кишиларнинг оқсилга бўлган талабини тўлиқ қондира олмаяпмиз.