Respublikamizda huquqiy va demokratik jamiyat qurish jarayoni muvaffaqiyatli amalga oshirilayotgan bir paytda ma’naviy jihatdan barkamol yosh avlodni tarbiyalab voyaga yetkazish hamda ularni ona yurtni sevishga, moddiy va ma’naviy boyliklarini asrab-avaylashga, atrof-muhit tozaligini ta’minlashga o`rgatish muhim ahamiyat kasb etadi. Modomiki, kelajagimiz yoshlar qo`lida ekan, boshlang`ich sinfdayoq o`quvchilarni tabiatni asrab-avaylashga oid ekologik bilimlar bilan qurollantirish va tabiat bilan yaqindan tanishtirib borish, ularga ekologik tarbiya berish, shu orqali ularning borliq to`g`risidagi tasavvurini boyitish, dunyoqarashini o`stirish, hayotiy tajribalarini mustahkamlash yanada muhim ahamiyat kasb etadi. Xususan, o`quvchilarga inson umri tabiat bag`rida kechishini, inson va tabiatning o`zaro bog`liqligini, ularning bir-biriga nisbatan ta’sir ko`rsata olishini hamda bu ta’sirlarning ijobiy va salbiy oqibatlarini anglatish, shu orqali bolalar o`rtasida ekologik tarbiyani yo`lga qo`yish, yosh qalblarda ona tabiatga mehr-muhabbat tuyg`ularini uyg`otish-bugungi kunning dolzarb vazifalaridan biridir. Shu nuqtai nazardan qaraganda, boshlang`ich sinf o`quvchilarini tabiat bilan tanishtirish va ularning ekologik tarbiyasini amalga oshirishning qulay pedagogik usullarini ishlab chiqish va didaktik imkoniyatlarga boy tarbiyaviy vositalarini aniqlash alohida ahamiyat kasb etadi.