ДИССЕРТАЦИЯНИНГ УМУМИЙ ТАВСИФИ
Мавзунинг долзарблиги. Корхоналарни модернизация қилиш, техник ва технологик қайта жиҳозлашни янада жадаллаштириш, иқтисодиётнинг асосий тармоқларида замонавий, мослашувчан технологияларни кенг жорий этиш мамлакатимиз Президенти И.А.Каримов томонидан ишлаб чиқилган инқирозга қарши чоралар дастурларининг энг муҳим вазифаларидан ҳисобланади. Бундай вазифаларни рўёбга чиқариш учун ускуна ва жиҳозлар иш унумдорлигини ошириш, иссиқлик-энергетик ресурсларни тежаш, маҳсулот таннархини камайтириш ва унинг сифатини юксалтириш ҳамда корхоналардаги экологик ҳолатни яхшилашни таъминлайдиган юқори самарали жараёнлар, ускуналар ва технологияларни яратиш ва уларни ишлаб чиқаришга кенг жорий қилиш муҳим аҳамият касб этади.