Ўзбекистон Республикаси Президенти И.А.Каримов таъкидлаганидек, «Халқимизнинг қадимий ва шонли тарихи туганмас бир достон бўлса, «Алпомиш» ана шу достоннинг шоҳ байтидир» . Дарҳақиқат, «Алпомиш» достони ўзбек халқи маданияти ва маьнавиятида жуда катта ўрин тутади. Доно халқнинг тафаккур маҳсули бўлмиш ушбу достон ёш авлоднинг баркамол шахс сифатида камол топишига доимий ҳисса бўлиб қўшилмоқда. Шу боис ҳам мазкур бадиий обидани умумтаълим мактаблари, ўрта махсус ва олий таълим босқичларида ўрганишга алоҳида эътибор бериб келинади.