Биотехнологияда ферментацион ва флотацион аппаратурада учрайдиган биринчи учта усул кўпроқ тарқалган. Биотехнологик аппаратура ишини анализ қилганда, одатда, кўпикнинг икки хил физик ҳолати ажратилади: динамик (турғун бўлмаган) ва структуравий – турғун. Динамик кўпик ўзида сирт актив моддаларни (САМ) тутмайдиган суюқликка газни киритганда ҳосил бўлади. Бундай кўпик, газ берилиши тўхтатилганда, сония улушларида ўлчанадиган жуда қисқа вақт ичида бузилади. Кўпик ҳажми берилаётган газ сарфига боғлиқ бўлади ва берилган сарфда вақт давомида ўзгармайди. Бундай кўпикда газнинг ҳажмий улуши 0,5 дан юқори бўлмайди.