Бугунги кунда инсоният олдида турган энг долзарб ва глобал муаммолардан бири, бу шубҳасиз экологик муаммолардир. Экологик хафсизлик муаммоси аллақачон миллий ва минтақавий доирадан чиқиб, бутун инсониятнинг умумий муаммосига айланганлигини ҳар биримиз теран англаймиз. Мустақиллик йилларида мамлакатимизда барча соҳалар қатори атроф-муҳит муҳофазасига, экологик муаммоларни бартараф этиш ва уни олдини олиш борасидаги ишларга давлатнинг асосий устивор йўналишларидан бири сифатида алоҳида эътибор қаратилди. Соҳада давлат назоратини ўрнатиш мақсадида табиатни муҳофаза қилиш давлат қўмитаси ташкил этилгани ислоҳотларни дебочаси бўлди, дейиш мумкин. Энг муҳими, қисқа давр ичида соҳанинг халқаро қонунчилик нормаларига жавоб берадиган мустаҳкам ҳуқуқий асоси яратилди.