БОЛАЛАРДА МИГРЕННИНГ КЛИНИК-НЕВРОЛОГИК ВА ИММУНОЛОГИК ХУСУСИЯТЛАРИ

Диссертация мавзусининг долзарблиги ва зарурати. Жаҳонда неврологик касалликлар орасида бош оғриғи болалик ва ўсмирлик даврида энг эътибор талаб этувчи патологиялардан бир бўлиб ҳисобланади. Ушбу касалликдан азият чекувчилар сони кудан кунга ошиб бормоқда. Жаҳон соғлиқни сақлаш ташкилоти (ЖССТ) маълумотига кўра, «мигрень беморларда энг кўп ижтимоий дезадаптацияга сабаб бўлувчи 19 та касаллик рўйхатига киритилган ва бош оғриғи мактаб ёшидаги болалар ўртасида 5,9% дан 82% гача учрайди» . Бу кўрсаткичларнинг асосий фоизини бирламчи бош оғриғи - мигрень ва зўриқишдаги бош оғриғи ташкил қилади. Бирламчи бош оғриқлари учраш частотасининг ёш ўтиши билан ошиши аниқланган, «бирламчи бош оғриғи 3 ёшда 8% ни, 5 ёшда 19,5% ни, 7 ёшда 37 - 51,5% ни, 7 ёшдан 15 ёшгача бўлган болалар ўртасида бу кўрсаткичлар 26 - 82% ни ташкил қилди» . Шу билан бирга болаларда бирламчи бош оғриғи, хусусан, мигреннинг асоратлари ижтимоий аҳамиятга эга муаммо ҳисобланади.