Одам ҳаёти давомида кислородга бўлган муҳтожликни нафас олиш билан қондиради. Нафас олиш тизими таркибига ташқи ҳаво билан қон ўртасида газ алмашинувини таъминловчи аъзолар киради. Газ алмашинуви — бу организмни ташқи муҳитдаги кислородни қабул қилиб, ўзидан карбонат ангидридни ташқи муҳитга чиқариш. Газ алмашинуви асосан нафас аъзолари билан жуда оз қисми эса тери орқали бўлади. Газ алмашинуви уч босқичдан иборат бўлиб, нафас аъзолари тизими унинг биринчи босқичини ёки ташқи муҳитдаги кислородни альвеолалар орқали қонга ўтиши ва қондаги карбонат ангидридни альвеолаларга ўтишини таъминлайди. Шунинг учун нафас олиш тизими ҳаво ўтказувчи йўллар: бурун бўшлиғи, ҳалқум, ҳиқилдоқ, кекирдак, бронхлар ва газ алмашинувда иштирок этувчи аъзо ўпкадан иборат.