Kechagina yuz ming tonnaning nari-berisida bug`doy etishtirilgan o`lkada bugun million-million tonnalik oltinrang xirmonlar tovlanib turibdi. Istiqlolgacha paxtadan boshqa ekin ekilmagan dalalarda bugun ming-minglab gektarlik g`allazorlar dengizdek mavjlanib yotibdi. Endi o`zbek dehqonining ombori donga to`la, dasturxonnidan o`z noni uzilmaydi. Bugun O`zbekistonning g`allachilikni rivojlantirish borasida ham beqiyos imkoniyatlarga ega ekanligi hech kimga sir bo`lmay qoldi. Ayni chog`da yurtimizda gektaridan yuz sentnerdan oshirib, sara don olayotgan omilkor dehqonlar marrani zabt etishga ham muvaffaq bo`lishyapti. Mutaxassislar e’tiroficha, respublikamizda g`alla hosildorligini oshirish, uning mahalliy tuproq-iqlim sharoitiga mos, istiqbolli navlarini yaratish borasida olib borilayotgan izlanishlar kelajakda yanada yangi natijalar berishi mumkin.