Маълумки, қориноёқли моллюскаларнинг бир қатор турлари чорва ва қорамолларга гельминт касалликларни келтириб чиқаришда асосий оралиқ хўжайин бўлиб хизмат қилса, яна бошқа (шиллиққуртлар) турлари эса қишлоқ хўжалик экинларининг жиддий зараркунандалари ҳисобланади. Ундан ташқари, қуруқлик моллюскалари ер экосистемаси фаунасининг бир қисми бўлиб, қуруқлик биоценози шаклланишида муҳим рол ўйнайди. Шунинг билан бир қаторда моллюскалар чиғаноқлари ер қатламларида яхши сақланиб, тоғ жинсларининг ёшини аниқлашда муҳим рол ўйнайди. Шу сабабли, ҳайвонот оламининг бу груҳига, зоологлар, палеонтологлар, паразитологларнинг қизиқиши ниҳоятда катта.