Мутахассис ўз соҳасида муаммоли вазиятларни ўз вақтида пайқай оладиган, уларни таҳлил қилиб тегишли ечимларни топадиган, шароитга тез мослашадиган бўлмоғи зарур. Бунинг учун у ўз билимларини, кўникмаларини ва малакасини мустақил ва муттасил равишда оширишни уддалай оладиган бўлиши керак. Бунинг учун талаба таълим муассасасида ҳар доим ҳам ўз билимларини мустаҳкамлаб бориши, янги билимларини ўзлаштириши, ижодий фаолиятини ошириши, амалий кўникма ва малакани шакллантириши зарурдир. Мазкур масалани ҳал этишда ОЎМТ вазирлигининг 14.08.2009 йил санасидаги 286-буйруғи ва унга илова қилинган Йўриқномаси катта аҳамиятга моликдир.