Холчаён саройлар мажмуаси бир нечта тепаликлар устига қурилган бўлиб, улкан меъморий-шаҳарсозлик мажмуаси кўринишидаги иморатлардан тузилган. Қадимги саройлар залларининг ички деворлари бўйлаб супалар ўрнатилган. Саройлар, одатда, пахсадан, ички заллар эса йирик хом ғиштлардан, айвонлар ёғоч устунлардан, тагкурсилар табиий тошлардан ишланган. Қадимги давр саройларининг деворлари маҳобатли суръатлар, ҳайкаллар, гулли нақшлар, токчалар билан безатилган.