ҚЎЛЛАШ БЎЙИЧА ЙЎРИҚНОМА

АМПИЦИЛЛИН 250 мг

AMPICILLIN 250 mg

Препаратнинг савдо номи: Ампициллин

Таъсир этувчи модда (ХПН): Ампициллин (ампициллин тригидрати кўринишида).

Чиқарилиш шакли: Таблеткалар 250 мг дан, алюмин фольга ва ПВХ плёнка блистерларда.

Таркиби

1 таблетка сақлайди:

Фаол модда: ампициллин тригидрати 250 мг;

Ёрдамчи моддалар: крахмал, тальк, декстрин, магний стеарати, гидроксипропилцеллюлоза, натрий крахмал гликоляти.

Фармакотерапевтик гуруҳи: Антибиотиклар (пенициллинлар гуруҳи).

Фармакологик хусусиятлари

Ампициллин – кенг таъсир доирасига эга бўлган яримсинтетик пенициллинлар гуруҳига мансуб антибиотик. Микроорганизмлар ҳужайраси деворининг синтезини тўхтатиб бактерицид таъсир қилади. Пенициллиназа таъсири остида парчаланади. Кислотага чидамли.

Препаратга қуйидаги микроорганизмлар доимо сезгир: пенициллиназа ишлаб чиқармайдиган Streptococci A, B, C, F, G; Str. pneumonia, L. monocytogenes, Corynebacterium diphtheria, Erysipelothrix rhusopathiae, Eikenella corrodens, N. meningitidis, Bordetella pertussis, Clostridium spp., Propioniobacterium acnes, Peptostreptococcus spp., Actinomyces spp., Leptospira spp., Treponema доимо сезгир эмаслар; Enterococcus faecalis, E. coli, Proteus mirabilis, Salmonella spp., Vibrio cholerae, H. influenzae, N. gonorrhoeae, Fusobacterium spp., Prevotella spp. чидамли: Staphylococcus spp., B. catarrhalis, Klebsiella spp., Enterobacter spp., C. diversus, C. freundii, Proteus vulgaris, Providencia rettgeri, Morganella morganii, Y. enterocolitica., Pseudomonas spp., Acinetobacter spp., Xanthomonas spp., Flavobacterium spp., Alcaligenes spp., Nocardia spp., Campylobacter spp., Legionella pneumophila, Mycobacterium spp., Bacteroides spp., Mycoplasma spp., Chlamydia spp.

Фармакокинетикаси

Препарат ичга қабул қилинганида меъданинг кислотали муҳити таъсирида парчаланмайди, қонга яхши сўрилади. Овқат препаратнинг сўрилишини сусайтиради. Қабул қилинганидан сўнг тахминан 1,5–2 соат ўтгач плазмадаги энг юқори концентрациясига эришилади. Организмнинг тўқималари ва суюқликларига киради, терапевтик концентрацияларда плеврал, перитонеал ва синовиал суюқликларида, ўт-сафрода аниқланади. Препарат йўлдош тўсиғи орқали ўтади, гематоэнцефалик тўсиқ орқали ёмон ўтади, она сутига чиқарилади Яримчиқарилиш даври тахминан 1 соат, анурияда бу давр 12–20 соатгача узаяди. Препаратнинг асосий қисми организмдан буйраклар орқали чиқарилади, шунинг учун сийдикда антибиотикнинг жуда юқори миқдори аниқланади. Препарат қайта қабул қилинганида, организмда тўпланиб қолмайди, бу уни катта дозаларда ва узоқ вақт қабул қилиш имкониятини беради.

Қўлланилиши

Бактериал инфекциялар: бронхит, пневмония, дизентерия, сальмонеллёз, узоқ вақт сальмонеллаларни ташувчилик, холецистит, кўкйўтал, пиелонефрит, уретрит, эндокардит, тери ва юмшоқ тўқималарнинг инфекциялари, гинекологик инфекциялар, қулоқ, бурун, томоқ инфекциялари, одонтоген инфекциялар, менингит, сепсис ва препаратга сезгир микроорганизмлар чақирган бошқа инфекциялар.

Қўллаш усули ва дозалари

Препарат овқатдан 0,5 – 1 соат олдин қабул қилинади. Ўртача оғирликда кечувчи инфекцияларда, катталар учун буюриладиган ўртача суткалик доза 2 – 3 г, оғир инфекцияларда – 10 г, менингитда  – 14 г. Болаларга препарат тана вазнига 50 – 100 мг/кг суткалик дозада буюрилади. Бир ёшгача бўлган болалар учун бу суткада 0,25 – 0,75 г, 1 ёшдан 6 ёшгача – суткада 0,75 – 1,5 г, 6 ёшдан 15 ёшгача – суткада 1,5 – 2 г ни ташкил қилади. Суткалик доза 2 – 4 қабулга, менингитда 6 – 8 қабулга бўлинади. Гонококкли уретрит бундан истисно, унда 3,5 г ичга бир қабулда буюрилади.

Даволаш курсининг давомийлиги одатда 5 – 10 кунни ташкил қилади, ўткир пиелонефритда 2 – 3 ҳафта, сурункали пиелонефритда – 6 ойдан кўпроқ.

Ножўя таъсирлари

Аллергик реакциялар (эшакеми, эритема, Квинке шиши, ринит, конъюнктивит; кам – иситма, бўғимларда оғриқлар, эозинофилия; жуда кам анафилактик шок). Марказий нерв тизимига токсик таъсири (буйрак етишмовчилиги бўлган беморларда жуда катта дозаларда қўлланганида), диспепсик ҳолатлар (диарея, кўнгил айниши, қайт қилиш), кандидоз, ичак дисбактериози бўлиши мумкин.

Қўллаш мумкин бўлмаган ҳолатлар

Мутлоқ: пенициллин қатори антибиотикларига юқори сезувчанлик, жигар фаолиятининг оғир бузилишлари, миастения, бир ёшгача бўлган болалар, препаратга сезгир бўлмаган штаммлар, айниқса псевдомонадалар ва стафилококклар чақирган инфекцион касалликлар.

Нисбий: цефалоспоринларга юқори сезувчанлик, анамнездаги аллергия, бронхиал астма, пичан тумови ёки эшакеми, инфекцион мононуклеоз, лимфолейкоздаги иккиламчи инфекциялар, ҳомиладорлик ва лактация даври.

Дориларнинг ўзаро таъсири

Бактериостатик антибиотиклар (тетрациклин, хлорамфеникол, эритромицин ва бошқалар) билан бир вақтда юборилганида ўзаро антагонизм юзага келади. Аминогликозид антибиотиклар билан препаратнинг микробларга қарши таъсирини самарасида синергизм кузатилади. Пробенецид билан бирга қўлланганида, у препаратни сийдик билан чиқарилишини камайтиради ва қон зардобида унинг миқдорини ошишига олиб келади, аллопуринол билан қўлланганида препаратнинг метаболизмини секинлаштиради ва тери тошмасини пайдо бўлиш тез–тезлигини оширади. Кам ҳолларда препарат перорал контрацептивларнинг таъсирини сусайтиради.

Махсус кўрсатмалар

Аллергик реакциялар пайдо бўлган ҳолда, препаратни қабул қилишни тўхтатиш ва  десенсибилизацияловчи даволашни ўтказиш керак. Сепсисли беморларда бактериолиз реакцияси (Яриш-Герксгеймер реакцияси) ривожланиши мумкин. Узоқ вақт даволашда ҳолсизланган беморларда, препаратга чидамли микроорганизмлар (ачитқисимон замбуруғлар, грамманфий микроблар) чақирган суперинфекция  ривожланиши мумкин. Бундай  беморларга препарат билан  даволаниш даврида В гуруҳи ва С витаминларини, зарурати бўлганида, нистатин ва леворинни буюрилиши лозим. Бронхиал астма, пичан иситма ва бошқа аллергик касалликларда, керакли ҳолларда препарат билан бир вақтда десенсибилизацияловчи воситалар қўлланади.

Препарат қўлланганида буйраклар, жигар фаолиятини ва қон манзарасини мунтазам назорат қилиш керак. Препарат буйрак етишмовчилиги бўлган пациентларга эҳтиёткорлик билан буюрилади.

Препарат болалар олаолмайдиган жойда сақлансин ва яроқлилик муддати ўтгач ишлатилмасин.

Сақлаш шароити

Қуруқ ва ёруғликдан ҳимояланган жойда, 25°С дан юқори бўлмаган ҳароратда.

Яроқлилик муддати

3 йил.

Дорихоналардан бериш тартиби

Рецепт бўйича.