ГИДРОСТАТИК ТОРТИШ — суюқликлар ва қаттиқ жисмлар зичлигини ўлчаш усули. Архимед қонунига асосланган. Қаттиқ жисмни икки марта — дастлаб ҳавода, сўнгра зичлиги маълум бўлган суюқлик ичида (одатда, дистилланган сувда) ўлчаш (тортиш) орқали шу жисмнинг зичлиги аниқланади. Биринчи ўлчашда жисм массаси аниқланади, ҳар иккала тортиш натижаларига кўра эса унинг ҳажми топилади. Суюқликнинг зичлигини аниқлаш учун унинг ичига массаси ва ҳажми аниқ бўлган бирор жисмни (одатда, шиша қалқовучни) тушириб, махсус тарозида тортиб кўрилади. Қандай аниқдикда ўлчаш зарурлигига қараб, Гидростатик тортиш техник, аналитик ёки намуна (эталон) тарозида амалга оширилади. Оммавий ўлчашларда аниқлиги кичикроқ, лекин ишлатиш учун қулай гидростатик тарозидан (конструкциясини немис кимёгари К. Ф. Mop 1849 й. да таклиф қилган) фойдаланилади.