ТАВР ТОҒЛАРИ, Торос (туркча Toros’lar) — Туркиянинг жан. қисмидаги тоғ системаси. Ўрта денгиз соҳили бўйлаб тахм. 1000 км га чўзилган. Кичик Осиё ва Шарқий Тавр тоғликларининг жан. даги тизмалар. Энг баланд жойи 3726 м (Темирқозиқ чўққиси). Асосан, оҳактошлардан, шунингдек, кристалли сланец ва метаморфик жинслардан тузилган. Тавр тоғларининг марказида айрим чўққиларнинг бал. 3000 м дан юқори, рельефи альп типли, қад. музликларнинг излари сақланган. Ғарбий қисмида карст ландшафти учрайди. Шим. ён бағирлари тиканли буталар усадиган чўл ва даштдан, жан. ён багри сернам бўлганлигидан доим яшил ўрмон ва бутазорлардан иборат, юқори қисми игна баргли ўрмонлар ва альп ўтлоқлари билан қопланган. Тавр тоғларини Дажла, Фурот дарёлари кесиб ўтади. Миллий боғлар ташкил этилган.