ТАЛАШҚОНТЕПА I — кўҳна шаҳар (мил. ав. 6—4-а. лар). Шеробод (Сурхондарё)дан 15 км жан. ғарбда жойлашган. Талашқонтепа Iнинг тарҳи айлана шаклида, диаметри 130 м, майд. 1,6 га дан кўпроқ. Қалинлиги 5 м га яқин бўлган пахса ва тўғри бурчакли хом ғиштлардан қад кўтарган девор билан ўраб олинган. Деворда диаметри 5 м дан кўпроқ бўлган 15 та айлана миноралар қурилган. Талашқонтепа Iда турли йилларда Э. В. Ртвеладзе, А. С. Сагдуллаев, Ш. Р. Пидаев, Ш. Б. Шайдуллаев каби археологолимлар тадқиқот ишлари олиб боришган. Қазишлар натижасида цилиндрсимон идишлар, кремний ва жездан ишланган ўқ учлари, ўғир дасталари, қирғичлар, кайроқтошлар ва деҳқончилик билан боглик бўлган буюмлар топилган.