ЎРТАБУЛОҚ НЕФТЬ-ГАЗ КОНДЕНСАТ КОНИ — Бухоро вилояти Қоракўл туманидаги коп. Бухоро шаҳридан 90 км жан. да. 1961 йилда очилган. 1973 йил фойдаланишга топширилган. Кон майдони рельефи тепаликлардан иборат.
Ўртабулоқ тизмаси Чоржўй тектоник поғонасининг марказий қисмидаги Денгизкўл кўтарилмасининг шарқий қисмида жойлашган. Бурма йирик брахиантиклиналдан иборат бўлиб, палеоген ётқизиқлари бўйича унинг марказий қисмида грабен мавжуд, унинг қанотларини силжиш амплитудаси 300 м га тенг. Коннинг геологик тузилишида мезозой ва кайнозой ётқизиқлари иштирок этади. Юра даври ётқизиқлари қумтош, алевролит, гил жинслардан ҳамда келловейоксфорд ярусининг карбонатларидан таркиб топган. Ўртабулоқ структурасида саноат миқёсидаги газлилик юра даврининг қдрбонат ётқизиқлари (15Р, 15НР горизонтлари)да аниқланган. Горизонт юқори ғовакликка эга бўлган органогендетритли оҳактошлардан тузилган. Қазилган 6 та қудуқ 2510—2500 м чуқ. да саноат миқёсидаги газ, 5 та қудуқ 2578—2556 м чуқ. да кучсиз нефть оқими (300 л/сутка) бўлган уюмларни очган. Газ уюми гумбазсимон, массив кўринишда. Кондаги 15горизонтнинг қатлам сувлари юқори даражада минераллашган, намакоб турига мансуб. Кондан ҳоз. кунда фойдаланилмоқда.