БАРАКАТХОН

БАРАКАТХОН ибн Давлат Малик (? – 1246) — Жалолиддин хоразмшоҳнинг нуфузли амирларидан бири. Отаси — Давлат Малик Хоразмшоҳ Малшаднинг ўғли Ғиёсиддин Пиршоҳнинг амири бўлган. Давлат Малик Эрон Озарбайжонидаги Занжон яқинидаги жангда ҳалок бўлгач (1224), Б. Озарбайжондаги илдегизийлар ҳукмдори Оғабек Ўзбек қўлида тарбия топган. Жалолиддин Ҳиндистондан қайтиб Табризни олгандан сўнг (1225), Б. унинг хизматига кирган ва тез орада йирик лашкарбошиларидан бирига айланган. Жалолиддин ҳалок бўлганидан сўнг (1231 й. авг.), Б. унинг бошқа амирлари Қирхон, Илон Буғо, Сарухон, Бердихон (Хонберди) қаторида Алоуддин Кайқубод қўшинига кирган. Аммо Кайқубоднинг вафотидан сўнг унинг вориси Кайхусрав хоразмийлар қўмондони Баракатхонни ўзига қарши фитнада иштирок этганликда айблаб ҳибсга олади. Шунда хоразмлик бошқа амирлар исён кўтариб, Баракатхонни озод қиладилар ва мамлакатни талонтарож қилиб кетадилар. 1237 — 46 й. ларда Баракатхон бошчилигидаги хоразмийлар Яқин Шарқ ҳукмдорларининг ўзаро низоларида иштирок этганлар. 1246 й. Б. Шом вилоятлари бирлашган қўшини томонидан мағлуб этилиб, жангда ҳалок бўлган, қўшини тарқаб кетган. Бир қисм қўшин Б. нинг ўғли қўмондонлигида халифа хизматига ўтган.