БАДЕН-ВЮРТЕМБЕРГ — ГФРнинг жан.-ғарбидаги ери. Майд. 35,7 минг км2. Аҳолиси 9,8 млн. киши (1991). Маъмурий маркази — Штутгарт ш. Б.-В. ер юзаси ўртача баландликдаги тоғлар, Рейн ва Дунай дарёлари ҳавзасида. Рельефи пасттекислик (Юқори Рейн), қирлар, ўрмонли тоғлар (Шварцвальд), сойликлардан иборат. Жан. да Боден кўли бор. Йилига 700 мм ёғин ёғади. Асосий дарёлари Рейн ва унинг бош ирмоғи Неккар, жан.-шарқида Дунайнинг бош қисми оқиб ўтади. Саноати ривожланган. Б.-В. ҳудудида тоштуз (Хейльбронн) ва калий тузи (Фрейбургдан жан. да), темир рудаси (Швабия Альби) ва полиметалл рудалари (Шварцвальд), нефть ҳамда газ (Юқори Рейн пасттекислиги) қазиб чиқарилади. Бир қанча ГЭС қурилган. Машинасозлик, айниқса автомобилсозлик, электротехника, қ. х. машинасозлиги, кемасозлик, авиаракета (Штутгарт, Мангеймда), станоксозлик ва вагонсозлик (Фридрихсхафенда) саноатлари ривожланган. Тўқимачилик, кимё, полиграфия, нефтни қайта ишлаш саноатлари ҳам бор. Тоғли жойларида соатсозлик ва заргарлик ҳамда музика асбоблари ишлаш тараққий қилган. Қ. х. да кўпроқ донли экинлар, қанд лавлаги, тамаки ва қулмоқ етиштирилади. Юқори Рейн, Неккар водийси ва Боден кўли соҳилида токчилик ривожланган. Йирик шаҳарлар атрофида сут чорвачилиги етакчи ўрин тутади. Рейн, Неккар дарёларида ва Боден кўлида кема қатнайди. Б.-В. да машҳур Баден-Баден ва Баденвейлар бальнеологик курортлари мавжуд. Гейдельберг, Фрейбург ва Тюбингенда ун-тлар бор.