АЗИМОВ Жалолиддин Азимович (1938.10.3, Андижон) — зоолог, Ўзбекистон ФА акад. (2000), биол. фанлари д-ри (1986), проф. (1988). Самарқанд қ. х. институтини битирган (1958). Ўзбекистон ветеринария и. т. институтида (1964—69), Ўзбекистон ФА Зоология ин-тида (1969—78) катта илмий ходим, Республика паррандачилик илмий и. ч. лабораторияси директорининг ўринбосари (1978-89), ТошДУ биол. ва тупроқшунослик ф-ти проф. (1989-91), 1991 й. дан Ўзбекистон ФА Зоология ин-ти директори. Азимовнинг илмий ишлари Ўзбекистон биогеоценозларидаги паразит организмлар фаунаси таркиби, шаклланиши ва биологик турлитуманлик эволюциясига бағишланган. У паразит — хўжайин тизими эволюцияси омиллари, турли умуртқалилар эндопаразитларининг ривожланиши ва фаунистик комплексларнинг пайдо бўлиш қонуниятларини аниқлаган.