CHANDIR — turkiy qabila. 8—9a. larda Sirdaryoning oʻrta va quyi oqimida, Orol dengizining jan. dagi choʻllarda yashovchi oʻgʻuzlar tarkibida boʻlganlar. Keyinchalik Chandir larning bir qismi Movarounnahrga oʻtib, oʻzbeklar va turkmanlar bilan aralash yashab, ular tarkibiga singib ketgan. Ayrim guruhlari oʻgʻuzlar tarkibida Ozarbayjonda oʻrnashib qolgan. 19-a. oxiri — 20-a. boshlarida Chandir larning ayrim guruhlari oʻtroq hayot kechirib, asosan, chorvachilik va dehqonchilik bilan shugʻullangan. 1924-y. dagi maʼlumotlarga koʻra, Chandir jami 3425 kishini tashkil etgan.