AHMEDOV Hojiakbar (1906.1.6, hoz. Namangan tumani Xonobod qishlogʻi — 1980.5.3, Namangan) — oʻzbek xonandasi (bariton) va aktyor. Oʻzbekiston xalq hofizi (1939). Hamnafaslari Jaʼfarxon Umarov va Jamolqori Gʻiyosovlar bilan birga Katta Fargʻona kanali, Shim. Toshkent kanali qurilishlarida qatnashgan. Namangan musiqali drama teatrida (1934—41), Muqimiy teatrida (1941— 62) ishlagan. Sardor («Tohir va Zuhra»), Xisrav («Farhod va Shirin»), Dehqon ota («Oftobxon»), Hoji, Goʻroʻgʻli («Nurxon», «Ravshan va Zulxumor»), Rais («Oltin koʻl»), Madumar («Vatan ishqi») va b. obrazlarni yaratgan. Repertuaridan katta ashula, ommabop oʻzbek qoʻshiqlari oʻrin olgan: «Hormangiz», «Kanalimga keling», «Ey, koʻngil», «Ilgʻor suvora», «Bir qamar», «Mehnat ila», «Hur diyorim», «Oʻzingdandir», «Oʻrgandim» va h. k. Namangan tumanidagi bolalar musiqa maktabiga Ahmedov nomi berilgan.