ARPAGʻON (Eremopyrum) — bugʻdoydoshlar oilasiga mansub bir yillik oʻsimliklar turkumi. Poyasi silliq, tuksiz, boʻyi 4 — 25 sm. Bargining eni 3—4 mm, tukli. Boshogʻi tuxumsimon, uz. 1,5 — 3 sm, eni 0,9 — 2 sm. Boshoqchasi 3 — 5 gulli. Arpagʻon apr. — may oylarida gullab, meva beradi. Asosan, qumloq va mayda toshli togʻ yon bagʻirlarida oʻsadi. Oʻzbekistonning barcha viloyatlarida, shuningdek Qoraqalpogʻistonda uchraydi. Arpagʻon — bahorgi eng yaxshi yem-xashak oʻsimligi. Uning tarkibida 12 — 14% gacha protein va 24 — 27% kletchatka boʻladi. Arpagʻonni hamma q. x. hayvonlari yeydi.