ANBAR BIBI MAQBARASI — Zangi ota majmuasi tarkibidagi maqbara. Toshkent yaqinidagi Zangi ota qishlogʻida barpo etilgan (15-a. boshlarida). Zangi ota maqbarasi qatori bu yodgorlik ham Amir Temur zamonasi meʼmorchilik anʼanasining yorqin namunasidir. Rivoyatlarga qaraganda, maqbara Zangi otaning xotini Anbar bibining qabri ustiga qurilgan. Maqbara ichidagi ikkinchi qabr Anbarbibining avvalgi qaynanasi Ulugʻposhshoniki. Anbar bibi maqbarasi keyingi asrlardagi taʼmirlanish oqibatida hozir oʻzining asli holatini deyarli yoʻqotgan. Anbar bibi xalq orasida afsonaviy shaxsga aylangan. U kishining ruhiga bagʻishlab oʻtkaziladigan urf-odat va marosimlarning koʻpchiligi suv toshqini, bola tugʻilishi va hosildorlik bilan bogʻliq boʻlgan.
Anbar bibi maqbarasi.