АУКСАНОМЕТР (юн. auxsan – ўсаман ва metreo) — ўсимликларнинг бўйига ўсишини ўлчайдиган асбоб. Тузилишига кўра бир неча хилга бўлинади. Энг оддий Ауксанометр даражаларга бўлинган ёй бўйича ҳаракатланувчи узун, енгил мил маҳкамланган горизонтал ўқ ва юкчали ип ўтказилган ғилдиракдан иборат.
Ипнинг бир учи ўсимликка боғлаб қўйилади, ўсимлик ўсганда мил бурилади ва милнинг ҳаракати шкала бўйича ҳисобланади. Ғилдиракка мил ўрнига кўзгу маҳкамланиши ҳам мумкин. Автоматик ёзиб оладиган мосламали Ауксанометрга ауксанограф дейилади. Ўсимликларнинг ўсишини қайд қилишда секинлаштириб кинога олиш энг қулай усул ҳисобланади.