АСАЛХЎР (Mellivora capinsis) — сув-сарлар оиласига мансуб сут эмизувчи ҳайвон. Танасининг уз. 68 — 75 см, думи 17 — 20 см. Оёқлари калта, панжалари кенг бўлиб, кучли тирноқлари ерни ковлаш учун мослашган. Жунлари сийрак ва қаттиқ. Танасининг пастки томони қора-оқ, устки томони оқиш. Африка, Олд, Ўрта ва Жан. Осиё (Ҳиндистон)да тарқалган. Ўрта Осиёда Туркманистон жан. да учрайди. Уяда ҳаёт кечиради, 3 — 4 та бола туғади. Майда умуртқалилар ва ҳашаротлар, жумладан арилар ва асал билан озиқланади. Жуда ноёб, кам ўрганилган, муҳофаза қилинади.