АРСИЯН ТИЗМАСИ — Грузиянинг жан. қисми ва Туркиядаги тоғ тизмаси. Ғарбда Кичик Кавказ тоғлари билан туташиб кетади. Энг баланд нуқтаси 3165 м (Арсиян чўққиси). Умумий уз. 150 км чамасида. Асосан гилли сланец ҳамда қумтошлардан ва вулкан жинслари (лава, туф) дан таркиб топган. Тоғ ён бағирларининг пастроғи қорақайин, каштан, юқорироғи қорақайин ва оққарағай, қорақарағай ўрмонлари билан қопланган, ундан ҳам баландда альп ўтлоқлари бор.