АНТАНАНАРИВУ (Тананариве) — Мадагаскар Республикасининг пойтахти. Антананариву провинциясининг маъмурий маркази. Мадагаскар о. нинг марказий қисмидаги платода жойлашган. Аҳолиси 802 минг киши (1990). Мамлакатнинг иқтисодий маркази. А. Таматаве порти ва Анцирабе шаҳри билан т. й. орқали туташган. Автомобиль йўллари тугуни. Антананаривудан 50 км нарида халқаро аэропорт бор. Саноати озиқ-овқат (гўшт консервалаш, шоли оқлаш), чарм пойабзал, кимё, тикувчилик, ёғочсозлик корхоналаридан иборат. Ун-т, тиббиёт ва фармакология, адабиёт ва социология миллим мактаблари, ФА, тарих ва халқ санъати музейлари, театрлар, расадхона, ботаника боғи бор. Антананариву 17-а. 1-ярмида бунёд этилган. 17 — 19-а. ларда Мадагаскар қиролларининг қароргоҳи. 1895 й. да Антананаривуни Франция қўшинлари эгаллагач, Тананариве номи б-н Франциянинг Мадагаскар мустамлакаси маъмурий маркази. 1960 й. 26 июндан мустақил Малагаси Республикасининг, 1975—92 й. лар Мадагаскар Демократик Республикасининг пойтахти.