АНДИЖОН БИОКИМЁ ЗАВОДИ — йирик кимё саноати корхонаси. Андижон ш. да жойлашган. «Ўзкимёсаноат» уюшмаси таркибига киради. Дондан ректификацияланган озиқ-овқат (этил) спирти ишлаб чиқаради. Республикадаги озиқ-овқат, тиббиёт, атир-упа ва б. саноат тармоқларини спирт билан таъминлайди. Корхона 1953 й. да Андижон гидролиз з-ди сифатида ташкил этилган ва чигит шулхаси, шоли қобиғидан техник этил спирти, озуқа ачитқилари, ксилит, нитролигнин ва б. маҳсулотлар ишлаб чиқарди. 90-й. лар бошидан атроф муҳитга салбий таъсирини ҳисобга олиб з-днинг ишлаб чиқариш йўналишини ўзгартириш ишлари бошланди ва 1994 й. дан гидролиз саноати и. ч. қувватлари тўхтатилди. 1991— 94 й. ларда этил спирти и. ч. қувватлари қурилиб, корхонанинг 1-навбати 1994 й. дек. да ишга туширилди (лойиҳа қуввати йилига 915 минг дал этил спирти). 1995 й. сент. дан корхонанинг (йиллик лойиҳа қуввати 877 минг дал бўлган) 2-навбати қурилиши бошланди ва 1999 й. да ишга туширилди.