АНАБЕНА (Anabaena Bory) — кўк-яшил сувўтлар бўлимига мансуб ўсимликлар туркуми. Кўпинча чучук сув ва тупроқда ўсади. Анабена қулай шароитда тез кўпайиб, сувнинг «гуллаши»га сабаб бўлади. Анабенанинг бир неча тури ҳаводаги эркин азотни ўзлаштириб, турли мураккаб органик бирикмалар ҳосил қилиш хусусиятига эга. Шунинг учун улардан тупроқ унумдорлигини оширишда фойдаланилади. Ўрта Осиё сув ҳавзалари ва тупроқларида Анабенанинг 60 га яқин тури бор.