ПАЛИНГЕНЕЗИС, палингенез (юн. palin — қайта, яна ва genesis — келиб чиқиш, туғилиш) — Ернинг чуқур қатламларидаги магматик тоғ жинсларининг қисман ёки тўла эриб магмага айланиш жараёни. «Палингенезис» термини фанга финляндиялик геолог Я. Сёдерхольм томонидан киритилган (1907 й.). Геотектоник шароитга қараб Палингенезисга учраган тоғ жинсларининг чўкиш ёки қатламларнинг бир-бирининг остига силжиш жараёнлари фарқ қилинади. Палинген магманинг Ер юзи яқинига кўтарилиши ороген интрузивлар ва диапир-плутонлар пайдо бўлишига олиб келади.