АЗИЗОВА Ширин Мирхоновна (1940.10.1, Ғиждувон) — Ўзбекистон халқ артисти (1988). Тошкент давлат санъат ин-тини тугатган (1961). 1961 — 64 й. лар Наманган театрида, 1968—87 й. лар Тошкентдаги Аброр Ҳидоятов номидаги драма театрида, 1987 й. дан Ҳамза театрида актриса. Азизова ижодига лирик, драматик роллар яқин бўлиб, образлари ҳаётийлиги, саҳна нутқининг мукаммаллиги билан ажралиб туради. Энг яхши роллари: Холисхон, Сора, Майсара («Холисхон», «Ишқ қурбонлари», «Майсаранинг иши»), Роҳила («Биринчи муҳаббат»), Муҳаббат («Ўн саккиз ёшлигим»), Нози («Баҳс»), Ўзбекойим («Ўтган кунлар»), Тамара («Жар»), қайнона («Чимилдиқ») ва б. «Ўзбекфильм» киностудияси фильмларида суратга тушган.