АЗИМУЛЛАХОН (? – 1859.7.10, Бхутвал) — инглиз мустамлакачиларига қарши Ҳиндистонда 1857—59 й. ларда кўтарилган халқ қўзғолони раҳбарларидан бири. Канпурдаги мактабда ўқитувчи. Қўзғолон бошланмасдан бироз илгари Битхур ш. га кўчиб келиб, Нана Соҳиб билан танишган. У билан бирга Шим. Ҳиндистон бўйлаб сафар қилиб халқни инглиз мустамлакачиларига қарши курашга даъват этган. 1857 й. май — июлда Канпурдаги қўзғолонга раҳбарлик қилган. Инглизлар Канпурни эгаллагач (17 июль) Нана Соҳиб билан Аудга чекинган.