АРҒУНШОҲ Ахтачи Бурдалиғий (14-а. 2-ярми — 15-а. боши) — Амир Темур лашкарбошиларидан. Амир Темурнинг амир Ҳусайн билан қилган жангларида фаол қатнашган, Мовароуннаҳрни душманлардан тозалашда жасорат ва шижоат кўрсатган. Амир Темурнинг кўп ҳарбий юришларида қатнашган. Ҳиндистон юриши (1398—99) ва «етти йиллик юриш» (1399—1404) йиллари Арғуншоҳ бир неча амирлар билан бирга «мўғул сарҳадининг забти» учун қўйилган. Амир Темур 1404 й. 27 нояб. да Хитой юришига кетаётиб, Арғуншоҳни Самарқандда кутвол лавозимида қоддирган. Бироқ 1405 й. 18 фев. да Амир Темур вафотидан сўнг юз берган тартибсизликлар ва Халил Султон томонидан уюштирилган фитнада у шаҳзода тарафида бўлган ва Сароймулк хоним, Туман оғо, Улуғбек, Иброҳим Султонни ва лашкарбошилардан амир Шоҳ Малик, Шайх Нуриддинларни Самарқандга киритмаган. Бу билан у Амир Темур барпо этган салтанатга путур етишига сабабчилардан бири бўлган.
Ашраф Аҳмедов.