«АМФИБИЯ» (юн. amphibios — икки хил ҳаёт кечирувчи) — 1) сувда ва қуруқликда юра оладиган автомобиль; кузови сув ўтказмайди, сувда сузганида эшкак винти ёки сув отувчи ҳаракатлантиргичи уни юргизади; сув рули ёрдамида бошқарилади;
2) ердан ва сувдан кўтариладиган ҳамда ерга ва сувга қўнадиган, ғилдиракли шассиси бўлган самолёт;
3) қорда, сувда, музда ҳаракатланиши учун чанғили кузови ўрнига қайиқчанғи ўрнатилган аэрочана; 4) сувда ва қурукликда ҳаракатланадиган жанговар машина (танк, бронетранспортер ва б.).