АЛИЕВ Бахтиёр Тошкентбоевич (1938.26.5, Тошкент) — чангчи, бастакор, Ўзбекистон халқ артисти (1983). Ҳамза номидаги мусиқа билим юртини (1955), Тошкент давлат маданият ин-тини (1995) тугатган. Ўзбек давлат филармониясининг ашула ва рақс ансамбли (1955), «Баҳор» ансамбли (1956 й. дан) созандаси, мусиқа раҳбари (1965 — 88 ва 1992 й. дан). Алиев репертуаридан ўзбек мусиқа мероси намуналари («Баёт I, III, V», «Соқийномаи савти калон» ва б.) ўрин олган. Бастакор сифатида 400 дан ортиқ рақс ва кўшиклар — «Тошкент гўзали», «Гулдаста», «Қирқ қиз», «Она мадҳи» (Б. Бровцин б-н), «Бахт қуши», «Оқ олтин» (Н. Зокиров б-н), «Бадахшон қизи», «Дил ноласи», «Баҳор нашидаси», «Мукаррамахоним ўйнаса» ва б., шунингдек «Чанг учун рапсодия» муаллифи.