АКУСТИКА МАТЕРИАЛЛАРИ — товуш ютувчи ва қайтарувчи материаллар. Акустика материалларининг товуш ютувчанлиги улардаги ғовакларнинг йирик-майдалигига ва туташ-туташмаслигига боғлиқ. Ғовак бетонлар, кўп қатламли гипс тахталар, акустик сувоқ (ғовак тўлдиргич ва боғловчи асосида тайёрланган қоришма), минерал пахта ва ундан ишланган намат, ёғоч қипиғидан ва асбест-картондан тайёрланган тахталар, қамиш ва сомон тахталар Акустика материаллари ҳисобланади. Бу материаллар сукунат талаб этиладиган хона деворларига ва саноат ускуналари тагига қўйишда ишлатилади.