АКЦЕЛЕРАЦИЯ (лот. accelaratio – тезлашиш) (биологияда) — эмбрион (пушт) ривожланишининг маълум босқичларида унинг айрим аъзолари шаклланишининг тезлашуви. Болалар ва ўсмирлар ўсиши ҳамда жисмоний ривожланишининг тезлашиши. Ҳоз. болалар ва ўсмирлар ҳар бир ёшда анча олдинги йиллардаги тенгқурларига нисбатан бўйчан бўлиб, вазни оғирроқдир. Болалар катта бўлган сари, бу фарқ шунчалик сезилади. Уларнинг сут тишлари олдин бўртади, доимий тишлар билан тезроқ алмашинади, скелетининг суякланиши ҳам олдинроқ юз беради. Оғир меҳнатнинг камайиши, умумий ҳаёт тарзи, маишийгигиеник шарт-шароитларнинг яхшиланиши, шунингдек яқин қариндошлар ўртасидаги никоҳга йўл қўймаслик ва б. А. га олиб келиши мумкин. Акцелерация фақат болалар гавда ўлчамларининг жадал катталанишида эмас, балки уларнинг дунёқараши ҳамда фикрлашлари илгарилаб кетиши, шунингдек эрта балоғатга етишида ҳам намоён бўлади.