БЎРОН ЎЛЧАГИЧ — кучли шамол (бўрон, пўртана) тезлигини ўлчайдиган асбоб. Б. ў. сифатида Uсимон манометрга уланган иккита (динамик ва статик) Пито найчасидан иборат асбоб, шунингдек кўп косачали анемограф ишлатилади. Анемографнинг сезгир элементи металл найчага маҳкамланган 10—21 косачалар тизимидан иборат. Ҳаво оқими таъсирида косачаларнинг қавариқ ва ботиқ томонларида аэродинамик қаршиликлар фарқи ҳосил бўлади; натижада буровчи момент вужудга келади ва найчани деформациялайди. Найча тензодатчикка, у эса ўлчаш кўпригига маҳкамланган. Бу асбобда 90 м/с гача тезликда эсаётган шамол тезлигини ўлчаш мумкин.
Бўрон ўлчагич: Кўп косачали анемографнинг қабул қилувчи қисми.