БЎЗШЎРА (Halogeton glomeratus (Bieb.) С. А. Меу.) — шўрадошлар оиласига мансуб бир йиллик ўсимлик. Бўйи 10—40 см, сершох. Барги кулранг, калта, этдор, учи узун дағал тукли. Гуллари майда, тўптўп бўлиб барг қўлтиғига жойлашган. Бўзшўра чўлда, шўрхок ерларда зич ўсади. Май ойида гуллаб, сент. да , меваси етилади. Бўзшўра баргида оксалат кислотанинг калий ва натрийли тузлари кўп бўлганидан қўйлар заҳарланади.