БУХГОЛЬЦ ЭКСПЕДИЦИЯСИ — Туркистонга жосуслик мақсадида юборилган ҳарбий экспедиция. Петр I нинг 1714 й. 22 май фармони билан тузилган. 1715 й. Тобольскдан чиқиб, Иртиш дарёсининг юқори оқими бўйлаб йўл олган 60 кема ва 3 минг кишидан иборат экспедицияга рус офицери И. Д. Бухгольц раҳбарлик қилган. Унинг мақсади Иртиш дарёси бўйига қалъа қуриш, Амударёдаги олтин сочмаларни текшириш ва дарёнинг денгизга қуйиладиган ерини аниқлаш ва тадқиқ этишдан иборат бўлган. Экспедиция 1715 й. окт. да Ямишево кўлига етиб бориб, унинг қирғоғида қалъа қуришга киришган.
1716 й. фев. да 10 минг кишилик қалмоқлар қўшини Бухгольц экспедициясига қўққисдан ҳужум қилган. Уч ойлик қамал ва қалъада юқумли касаллик тарқалганидан сўнг, Бухгольц омон қолган қўшини (700 киши) билан 1716 й. охирида Тобольскка қайтиб кетган.