RADIANT (lot. radians — nurlanuvchi) — meteor moddalar galasiga tegishli meteorlar («uchar yulduzlar») izini orqaga davom ettirganda ular kesishadigan osmon sferasidagi nuqta. Meteor chaqnashi, odatda, Quyosh atrofidan umumiy orbita boʻylab aylanayotgan meteorlar oqimida roʻy beradi va bir necha tun davomida osmon sferasining biror qismida kuzatiladi. Osmon sferasida kuzatilayotgan meteor galasidagi meteorlar goʻyo Radiantdan chiqayotgandek koʻrinadi.