PASTERNAK Boris Leonidovich [1890.29.1(10.2), Moskva – 1960.30.5, Moskva viloyati Peredelkino qishlogʻi] — rus shoiri. Sanʼatkor oilasida tugʻilgan. Bolalik va yoshlik yillarida tasviriy sanʼat va musiqa kompozitsiyasi b-n qiziqqan. 1909-y. musiqachilik kasbidan voz kechib, Moskva un-tining tarix-falsafa f-tiga oʻqishga kirgan. 1912-y. Germa-niyaga borib, Mar-burg un-tida bir semestr oʻqigan. Ammo koʻp oʻtmay, faylasuflik istiqbolidan ham voz kechib, sheʼriyat bilan shugʻullana boshlagan. «Bulutlar orasidagi egizak» (1914) nomli birinchi sheʼriy toʻplami nashr etilgan. 1917-y. toʻntarishi arafasida u futuristlar bilan aloqa oʻrnatib, ular taʼsiriga beriladi. Biroq boshqa futuristlardan farqdi oʻlaroq, Pasternak oʻtmish va «eski» madaniyatdan yuz oʻgirmay, 19-a. rus (M. Yu. Lermontov, F. I. Tyutchev) va nemis (R. M. Rilke) falsafiy li-rikasi anʼanalarini davom ettiradi. «Hayot mening hamshiram» (1917) sheʼrida Pasternak sheʼriyatining muhim xususiyatlaridan biri — tabiat olami, hayot bilan uzviylik ilk bor koʻzga tashlanadi. 20-y. lardan boshlab Pasternak sheʼriyatida li-rikadan epos sari intilish tamoyili seziladi va u «Toʻqqiz yuz beshinchi yil», «Leytenant Shmidt» dostonlarida lirik tafakkurdan epik tafakkurga oʻta boshlaydi. Pasternak urush va inqiloblar davridagi inson taqdiriga ba-gʻishlangan «Samoviy yoʻllar» (1924 — 33) nasriy kitobi hamda «Sikorskiy» sheʼriy romanida voqeiy syujetga qarshi oʻlaroq tabiat olami va muhabbat bilan bogʻliq syujetni oʻrtaga tashlaydi. Pasternak bu asarlarida inqilob oldida turgan yuksak maqsadni tan olgani holda maqsadga erishishning inqilobiy zulm va zoʻravonlik yoʻlini keskin inkor etadi. 30-y. larning oʻrtalarida — 40-y. larda yaratgan asarlarida («Sanʼatkor», 1936; «Barvaqt yurgan poyezdlar», 1931) Pasternak obrazlar tizimini soddalashtirib, rus klassiklariga xos «ravshan uslub»ga oʻta boshlagan.
Pasternak qariyb butun ijodi davomida nasriy asarlar yaratishga ham katta eʼtibor bergan. U urushdan keyingi yillarda «Doktor Jivago» (1957, Milan) romanini yozib, unda shaxsiy hayot bilan ijtimoiy borliq oʻrtasida arosatda qolgan Sergey Sikorskiyga qondosh rus ziyolisining obrazini yaratgan. U ushbu romanda sovet davri yozuvchilari orasida birinchi boʻlib inqilob gʻoyasini rad etgan va jamiyatni ijtimoiy jihatdan qayta qurish mumkinligiga shubha bildirgan. Mazkur asar P. ning totalitar tuzum tomonidan tazyiq ostiga olinishiga sabab boʻlgan. Pasternak 50—60-y. larda «Yayragan chogʻingda» (1956—59) sheʼrlar turkumi, «Odamlar va holatlar» (1957), «Koʻr sohib-jamol» (1969-y. nashr etilgan) drama-tik dostonlarini yozgan. Shekspir, Gyote, Shelli, Verlen, Petyofi va b. shoirlarning asarlarini rus tiliga tarjima qilgan. Nobel mukofoti la-ureati (1958).
As: Stixotvoreniya i poemы, M. —L., 1965; Vozdushnыye puti. Proza raznыx let, M., 1982.
Naim Karimov.