PAVE DE KURTEY (L) (Pavet de Courteille) (1821 — Parij — 1889) — fransuz lugʻatshunosi. Parij oliy oʻquv yurtlarida turkiy tillar kafedrasini boshqargan. «Boburnoma» (1871—73), «Merojnoma» (1882), «Tazkirai avliyo» (1889) asarlarini nashr kilgan. Pave de kurtey K. ilmiy faoliyatida «Chigʻatoycha — fransuzcha lugʻat» alohida ahamiyatga ega. Mazkur lugʻat soʻzligi Alisher Navoiy asarlari asosida tuzilgan. Misollar ichida Bobur, Abulgʻozixon asarlaridan olingan bayt va parchalar ham bor. Lugʻatda eski oʻzbek tilidagi soʻzlar fransuzchaga ixcham va loʻnda agʻdarilgan, shuningdek, oʻzbeklarning urf-odatlariga oid soʻzlarga keng izoxlar berilgan. Pave de kurtey K. ning ushbu lugʻati eski oʻzbek tilini oʻrganishda muhim manba hisoblanadi.