LIVORNO — Italiyaning markaziy qismidagi shahar. Livorno provinsiyasining maʼmuriy markazi. Aholisi 148 ming kishidan ziyod (2001). Liguri dengizi sohilidagi port. Yirik savdo markazi. Kemasozlik, neftni qayta ishlash, qora va rangli metallurgiya, mashinasozlik, elektrotexnika, kimyo, oziq-ovqat sanoati korxonalari, Dengiz akademiyasi, muzey, dengiz akvariumi bor. Harbiy dengiz bazasi. 16 — 18-a. larga oid meʼmoriy yodgorliklar saqlangan. Livorno oʻrta asrlarda qalʼa boʻlgan. 16-a. ning 2-yarmida Oʻrta dengiz boʻyidagi eng muhim xalqaro portga aylandi.