БИЗҒАЛДОҚ (Tetrax tetrax) — турнасимонлар туркуми тувалоқлар оиласига мансуб қуш. Оғирлиги 1 кг гача, катталиги товукдек келади. Европа, Осиё ва Шим. Африка даштларида, баъзан қумли чўлларида яшайди, уясини ҳам шу ерларга қуради. Қишлаш учун кузда Ўрта Осиёдан иссиқ мамлакатларга учиб кетади. Қиши унча совуқ бўлмайдиган жан. ўлкаларда яшайди. Бизғалдоқ кўпинча 3 — 5, баъзан 7 — 8 ва, ҳатто, 11 тагача тухум қўяди. Тухумини урғочиси босади, эркаги эса жўжалари учирма бўлгунча уларни боқишда қатнашади. Баҳор, куз ва қишда ўтлар, езда эса ҳашаротлар б-н озикланади. Гўшти жуда мазали. Сони камайиб кетганлигидан Бизғалдоқни овлаш тақиқланган. Бир қанча мамлакатларнинг Кизил китобига киритилган.